ភ្នំពេញ: សម្ដេចក្រឡាហោម ស ខេង ត្រលប់មកដល់កម្ពុជាវិញហើយបន្ទាប់ពីធ្វើដំណើរទៅពិនិត្យសុខភាព និងវះកាត់នៅប្រទេសបារាំង។ ក្នុងសេចក្តីជូនដំណឹងចុះថ្ងៃ៦ កញ្ញា នេះ ខុទ្ទកាល័យសម្ដេចក្រឡាហោម ស ខេង ឱ្យដឹងថា សម្ដេចបានត្រលប់មកដល់កម្ពុជាវិញហើយនៅព្រឹកថ្ងៃទី៦ កញ្ញានេះ បន្ទាប់ពីបានធ្វើដំណើរទៅប្រទេសបារាំងចំនួន២សប្ដាហ៍ ដើម្បីពិនិត្យសុខភាព និងទទួលការវះកាត់នៅទីនោះ។

បច្ចុប្បន្នសម្ដេចក្រឡាហោម ស ខេង កំពុងធ្វើចត្តាឡីស័ក ស្របតាមគោលការណ៍សុខាភិបាលរបស់រាជរដ្ឋាភិបាលកម្ពុជា។ គួររំលឹកផងដែរថា ក្នុងដំណើរទៅប្រទេសបារាំងរបស់សម្ដេច ស ខេង ទៅប្រទេសបារាំង ត្រូវបានលោក សម រង្ស៊ី និងមនុស្សមួយចំនួនបានបំភ្លៃព័ត៌មានថា វត្ដមានរបស់សម្ដេចទៅបារាំងនេះគឺជួបជាមួយលោក សម រង្ស៊ី ដើម្បីបង្កើតរដ្ឋាភិបាលបណ្ដោះអាសន្នមួយ។

ទោះជាយ៉ាងណា កូនប្រុសរបស់សម្ដេច ស ខេង គឺលោក ស សុខា នៅថ្ងៃទី៣១ សីហា បានបញ្ជាក់នៅលើបណ្ដាញសង្គមហ្វេសបុករបស់លោក ដោយច្រានចោលព័ត៌មាននេះ និងស្នើឱ្យបញ្ឈប់ល្បែងនយោបាយបែបនេះតទៅទៀត។ ខណៈដែលអ្នកនាំពាក្យក្រសួងមហាផ្ទៃនៅថ្ងៃ២៩ សីហា ថា ក្រសួងកំពុងស្រាវជ្រាវស្វែងរកចាប់ខ្លួនអ្នកដែលបំភ្លៃព័ត៌មានទាំងនោះផងដែរ៕